ਸੋਨਾ, ਜਿਸਨੂੰ ਦਹਾਕਿਆਂ ਤੋਂ "ਸੁਰੱਖਿਅਤ ਪਨਾਹਗਾਹ- Safe Heaven" ਮੰਨਿਆ ਜਾਂਦਾ ਸੀ, ਹੁਣ ਖੁਦ ਇੱਕ ਨਾਜ਼ੁਕ ਸਥਿਤੀ ਵਿੱਚ ਹੈ। ਪਿਛਲੇ ਕੁਝ ਹਫ਼ਤਿਆਂ ਵਿੱਚ ਸੋਨੇ ਅਤੇ ਚਾਂਦੀ ਦੀਆਂ ਕੀਮਤਾਂ ਵਿੱਚ ਆਈ "ਸੁਨਾਮੀ" ਨੇ ਪਿਛਲੇ 45 ਸਾਲਾਂ ਦੇ ਰਿਕਾਰਡ ਤੋੜ ਦਿੱਤੇ ਹਨ। ਮਾਰਚ ਦੇ ਮਹੀਨੇ ਵਿੱਚ ਹੁਣ ਤੱਕ ਆਈ ਗਿਰਾਵਟ ਨੇ ਨਾ ਸਿਰਫ਼ ਨਿਵੇਸ਼ਕਾਂ ਦੀ ਨੀਂਦ ਉਡਾ ਦਿੱਤੀ ਹੈ ਬਲਕਿ ਇਹਨਾਂ ਕੀਮਤੀ ਧਾਤਾਂ ਨੂੰ "ਬੇਅਰ ਮਾਰਕੀਟ" ਦੇ ਹਨੇਰੇ ਪੜਾਅ ਵਿੱਚ ਵੀ ਧੱਕ ਦਿੱਤਾ ਹੈ। ਇਸ ਮਹੀਨੇ ਹੀ, ਸੋਨਾ 20 ਪ੍ਰਤੀਸ਼ਤ ਤੋਂ ਵੱਧ ਡਿੱਗ ਗਿਆ ਹੈ, ਜਦੋਂ ਕਿ ਚਾਂਦੀ 33 ਪ੍ਰਤੀਸ਼ਤ ਡਿੱਗ ਗਈ ਹੈ। ਇਹ ਮਾਰਚ 1980 ਤੋਂ ਬਾਅਦ ਸੋਨੇ ਲਈ ਸਭ ਤੋਂ ਤੇਜ਼ ਮਹੀਨਾਵਾਰ ਗਿਰਾਵਟ ਹੈ।
ਜਦੋਂ ਇਨ੍ਹਾਂਦੇ ਹਾਲੀਆ ਰਿਕਾਰਡ ਉੱਚਿਆਂ ਦੇ ਮੁਕਾਬਲੇ ਤੁਲਨਾ ਕੀਤੀ ਜਾਵੇ, ਤਾਂ ਸੋਨੇ ਅਤੇ ਚਾਂਦੀ ਲਈ ਸਥਿਤੀ ਹੋਰ ਵੀ ਚਿੰਤਾਜਨਕ ਜਾਪਦੀ ਹੈ। ਆਪਣੇ All Time High ਤੋਂ, ਸੋਨਾ ਲਗਭਗ 24 ਪ੍ਰਤੀਸ਼ਤ ਅਤੇ ਚਾਂਦੀ ਲਗਭਗ 41 ਪ੍ਰਤੀਸ਼ਤ ਡਿੱਗ ਗਈ ਹੈ। ਤਕਨੀਕੀ ਭਾਸ਼ਾ ਵਿੱਚ, ਜਦੋਂ ਕੋਈ ਸੰਪਤੀ ਆਪਣੇ ਸਿਖਰ ਪੱਧਰ ਤੋਂ 20 ਪ੍ਰਤੀਸ਼ਤ ਜਾਂ ਇਸ ਤੋਂ ਵੱਧ ਡਿੱਗਦੀ ਹੈ, ਤਾਂ ਇਸਨੂੰ ਅਧਿਕਾਰਤ ਤੌਰ 'ਤੇ "Bearish Market" ਮੰਨਿਆ ਜਾਂਦਾ ਹੈ।
ਰਾਜਧਾਨੀ ਦਿੱਲੀ ਵਿੱਚ, ਅੱਜ 24 ਕੈਰੇਟ ਸੋਨੇ ਦੀ ਪ੍ਰਤੀ 10 ਗ੍ਰਾਮ ਕੀਮਤ 7000 ਰੁਪਏ ਤੱਕ ਘਟ ਗਈ ਹੈ, ਅਤੇ 22 ਕੈਰੇਟ ਸੋਨਾ ਵੀ 6500 ਰੁਪਏ ਦੇ ਕਰੀਬ ਸਸਤਾ ਹੋ ਗਿਆ ਹੈ। ਪਿਛਲੇ ਦੋ ਦਿਨਾਂ ਵਿੱਚ, 24 ਕੈਰੇਟ ਸੋਨੇ ਦੀ ਕੀਮਤ 15,330 ਰੁਪਏ ਪ੍ਰਤੀ 10 ਗ੍ਰਾਮ ਘਟੀ ਹੈ, ਜਦੋਂ ਕਿ 22 ਕੈਰੇਟ ਸੋਨੇ ਦੀ ਕੀਮਤ 14,460 ਰੁਪਏ ਘਟੀ ਹੈ। ਸਥਿਰਤਾ ਦੇ ਇੱਕ ਦਿਨ ਤੋਂ ਬਾਅਦ, ਪਿਛਲੇ ਦੋ ਦਿਨਾਂ ਵਿੱਚ ਇੱਕ ਕਿਲੋਗ੍ਰਾਮ ਚਾਂਦੀ ਦੀ ਕੀਮਤ 15,100 ਰੁਪਏ ਘੱਟ ਗਈ ਹੈ।