ਜ਼ੀਆਬਾਦ ਦੇ ਰਾਜਨਗਰ ਸਥਿਤ ਰਾਜ ਐਂਪਾਇਰ ਸੁਸਾਇਟੀ ਦੇ ਨਿਵਾਸੀ ਹਰੀਸ਼ ਰਾਣਾ, ਜੋ ਪਿਛਲੇ 13 ਸਾਲਾਂ ਤੋਂ ਮੌਤ ਅਤੇ ਜ਼ਿੰਦਗੀ ਦੇ ਵਿਚਕਾਰ ਜੰਗ ਲੜ ਰਹੇ ਸਨ, ਆਖ਼ਰਕਾਰ ਮੰਗਲਵਾਰ ਨੂੰ ਦਿੱਲੀ ਦੇ ਏਮਜ਼ (AIIMS) ਹਸਪਤਾਲ ਵਿੱਚ ਅਕਾਲ ਚਲਾਣਾ ਕਰ ਗਏ। ਸੁਪਰੀਮ ਕੋਰਟ ਵੱਲੋਂ 'ਪੈਸਿਵ ਯੂਥਨੇਸ਼ੀਆ' (ਇੱਛਾ ਮੌਤ) ਦੀ ਇਜਾਜ਼ਤ ਮਿਲਣ ਤੋਂ ਬਾਅਦ ਉਨ੍ਹਾਂ ਨੂੰ ਦਰਦ ਤੋਂ ਮੁਕਤੀ ਮਿਲ ਗਈ ਹੈ। ਹਰੀਸ਼ ਦੀ ਮੌਤ ਦੀ ਖ਼ਬਰ ਨਾਲ ਇਲਾਕੇ ਵਿੱਚ ਸੋਗ ਦੀ ਲਹਿਰ ਹੈ ਪਰ ਉਨ੍ਹਾਂ ਦੇ ਸੰਘਰਸ਼ ਦੀ ਕਹਾਣੀ ਹੁਣ ਸਿਨੇਮਾ ਦੇ ਵੱਡੇ ਪਰਦੇ ਰਾਹੀਂ ਦੁਨੀਆ ਤੱਕ ਪਹੁੰਚਣ ਦੀ ਤਿਆਰੀ ਵਿੱਚ ਹੈ।
ਹਰੀਸ਼ ਰਾਣਾ ਦੇ 13 ਸਾਲਾਂ ਦੇ ਅਸਹਿ ਦਰਦ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ ਸਬਰ ਦੀ ਕਹਾਣੀ ਨੇ ਬਾਲੀਵੁੱਡ ਦਾ ਧਿਆਨ ਆਪਣੇ ਵੱਲ ਖਿੱਚਿਆ ਹੈ। ਮੁੰਬਈ ਦੇ ਇੱਕ ਮਸ਼ਹੂਰ ਲੇਖਕ-ਨਿਰਮਾਤਾ ਨੇ ਹਰੀਸ਼ ਦੇ ਜੀਵਨ 'ਤੇ ਬਾਇਓਪਿਕ ਬਣਾਉਣ ਦੀ ਇੱਛਾ ਜ਼ਾਹਰ ਕੀਤੀ ਹੈ। ਇਸ ਸਬੰਧੀ ਪਰਿਵਾਰ ਦੇ ਵਕੀਲ ਮਨੀਸ਼ ਜੈਨ ਨਾਲ ਸ਼ੁਰੂਆਤੀ ਗੱਲਬਾਤ ਵੀ ਹੋ ਚੁੱਕੀ ਹੈ। ਹਾਲਾਂਕਿ, ਮਾਮਲੇ ਦੀ ਸੰਵੇਦਨਸ਼ੀਲਤਾ ਨੂੰ ਦੇਖਦੇ ਹੋਏ ਅਜੇ ਕੋਈ ਜਲਦਬਾਜ਼ੀ ਨਹੀਂ ਕੀਤੀ ਜਾ ਰਹੀ। ਵਕੀਲ ਅਨੁਸਾਰ, ਇਹ ਸਿਰਫ਼ ਇੱਕ ਕਾਨੂੰਨੀ ਲੜਾਈ ਨਹੀਂ, ਸਗੋਂ ਇੱਕ ਪਿਤਾ ਦੇ ਹੌਸਲੇ ਅਤੇ ਨਿਆਂਪਾਲਿਕਾ ਦੀ ਸੰਵੇਦਨਸ਼ੀਲਤਾ ਦੀ ਮਿਸਾਲ ਹੈ।
ਅਗਸਤ 2013 ਵਿੱਚ ਰੱਖੜੀ ਵਾਲੇ ਦਿਨ ਚੰਡੀਗੜ੍ਹ ਯੂਨੀਵਰਸਿਟੀ ਵਿੱਚ ਸਿਵਲ ਇੰਜੀਨੀਅਰਿੰਗ ਦੇ ਅੰਤਿਮ ਸਾਲ ਦੇ ਵਿਦਿਆਰਥੀ ਹਰੀਸ਼ ਆਪਣੀ ਭੈਣ ਨਾਲ ਫ਼ੋਨ 'ਤੇ ਗੱਲ ਕਰਦੇ ਹੋਏ ਪੀਜੀ (PG) ਦੀ ਚੌਥੀ ਮੰਜ਼ਿਲ ਤੋਂ ਡਿੱਗ ਗਏ ਸਨ। ਇਸ ਹਾਦਸੇ ਵਿੱਚ ਉਹ 'ਕਵਾਡ੍ਰੀਪਲੇਜੀਆ' (Quadriplegia) ਦਾ ਸ਼ਿਕਾਰ ਹੋ ਗਏ, ਜਿਸ ਕਾਰਨ ਉਨ੍ਹਾਂ ਦੇ ਹੱਥਾਂ-ਪੈਰਾਂ ਨੇ ਕੰਮ ਕਰਨਾ ਬੰਦ ਕਰ ਦਿੱਤਾ ਅਤੇ ਉਹ ਪੂਰੀ ਤਰ੍ਹਾਂ ਬਿਸਤਰ 'ਤੇ ਆ ਗਏ। ਪੁੱਤਰ ਦੀ ਅਸਹਿ ਪੀੜਾ ਨੂੰ ਦੇਖਦੇ ਹੋਏ ਮਾਪਿਆਂ ਨੇ ਦਿੱਲੀ ਹਾਈ ਕੋਰਟ ਤੱਕ ਪਹੁੰਚ ਕੀਤੀ ਸੀ ਪਰ 8 ਜੁਲਾਈ 2025 ਨੂੰ ਅਪੀਲ ਖਾਰਜ ਹੋ ਗਈ। ਇਸ ਤੋਂ ਬਾਅਦ ਸੁਪਰੀਮ ਕੋਰਟ ਨੇ 11 ਮਾਰਚ 2026 ਨੂੰ ਮਨੁੱਖੀ ਆਧਾਰ 'ਤੇ ਹਰੀਸ਼ ਨੂੰ 'ਪੈਸਿਵ ਯੂਥਨੇਸ਼ੀਆ' ਦੀ ਇਜਾਜ਼ਤ ਦਿੱਤੀ।